51 (244)

(En tinta roja:) Joan Ferrandez.

Notum sit omnibus hominibus tam presentibus quam futuris quod ego Iuan Ferrandez de Rio secco e mi mugier Maria Iohannis con uoluntat de nostros filios por nostras bonas uoluntades e por salut de nostras almas e de nostros parientes damos a uos abbat don Rodrigo de Sancta Maria de Rio seco e a tot el conuent los que son presentes e los que an de uenir las dos partes que auemo (sic) en la ferrent que iaçe entrel solar de Iuan Peidrez e entrel solar de Sant Martin de Felines e la faça del uerto que auiemos entre lo uuestro de todas partes, e e (sic) estas dos nombradas faças uos damos por nuestra quinta e que esto uos sea saluo que ninguno non uos lo pueda contralar.
Damos por fiador a don Iuan de la Cueua a fuero de tierra que riedre tot omne que deua heredar lo nuestro.
Facta carta sub era Mª CCª L XIIIª.
Testes qui hoc uiderunt et audierunt, de filios dalgo: don Uermudo fi de Roi Peidrez de Uila lain, Martin Diet dandino, Roi Despeio. De labradores, de Fuent morera: fijos de Iuan Migael, Petro Iohannis e Domingo Iohannis, Domingo Pedrez de Foz portero del rei. De Rio secco: don Iohannes de la Cueua, Pascual, Juan Peidrez e so fijo, Petro Çorita//(fol. 29r), Martin Iohannis Chufon, Martin Chicho, Petro Ferrandez so annado, Domingo Moçot, Martin Martinez e sos filios, Johannes e Martin Peidrez, Martin Peidrez fi de Petro Peidrez, frey Martin de Muradielo el cantor, frey Didacus de Uila luenga, frey Ioan de Frias, frey Iohan de Ortega e tot el conuent de Rio secco.
Petrus Iordani scripsit.

En la edición de Cadiñanos Bardeci este documento aparece situado sólo en el folio 28v.