[sin título] (166)

In Dei nomine amen. Cognoscida cosa sea a los qui son e a los que an de ser cum yo Fernan Roiz, fiio de Roy Diaz de Campos de mi buena uoluntad hi en remission de mios peccados hi en saluamiento de mi anima e de mio padre e de mi madre e de mi ermana e de mio ermano e de mi mugier dona Aldara e de mios parientes offeresco e do a Dios e a Sancta Maria e al abbad don Martin e al conuento de Sant Migael de Uilla Mayor quanto heredamiento yo e en Espi- // (fol. 48v) (col. a) nosa sobre Ormaza, nomnada (sobrepuesto: mientre) solares poblados e non poblados con entradas e con exidas, tierras e uinnas, huertos e molinos, prados en montes hi en pastos, en aguas corrientes e non corrientes. Est heredamiento nombrado do yo Fernan Roiz a tal pleto que sea tenido un cappellan todos los dias del mundo que cante missa e diga las horas por mi e por mios parientes e que salga sobre nuestra sepultura. Jo abbad don Martin otorgo esta carta e so tenido de complirlo con los offitiales del monesterio fra Diago de Uillariualdo prior, fra Garcia de Arniellas sosprior, fra Iuan de Olea sacristano, fra Domingo de la Uilliella cellerizo, fra Pedro de Padiella uestiario e todo el conuento plaçenteros e otorgadores. E si los que uernan depues de nos en la casa de Sant Migael en nuestros logares non quisieren complir este pleto segund dize esta carta, por los que minguare o falletiere tuelgales Dios el bien que a prometido a los sos fideles de dar, ca nos no metemos hi otros pennos ni otros fiadores si no a Dios hi a Sancta Maria hi a Sant Migael hi a Sant Nicholas hi a Sant Augustin hi todos los otros sanctos que son padrones en el monesterio que lo uean e lo testiguen ante la faz de Ihesu Christo que lo gualardone al cauallero que lo bien enpezo hi a todos los que lo bien aternan. Jo Fernan Roiz otorgo esta carta con mi fija dona Alduenza e con mi fijo Roy Diaz e con mio fijo Iuuan (col. b) Fernandez e con mi fija dona Aldara e con mi fiia Theresa Fernandez. E qual que quier de mi generation o dotra quisiere esta carta quebrantar, sea de Dios malito e descomulgado assi cum Iudas traydor en infierno dannado e peche en coto C libras de oro e la heredad en tal logar doblada al monesterio.
Desto son pesquisas de fiiosdalgo Juan Arias, Juan Iuanes, Nunno Fernandez, don Galuan, Munnio Garcia, Gonzaluo Garcia, Garci Munioz, Gonzaluo Munioz, Pedro Roiz fijo de Roy Perez, Pedro Rodriguez, Guter Guterrez de Roy Diaz, Alfonso Onzaluez, Albar Iuannes.
Anno Mº CCº XLº.